Qaysi javobda ot va sifat turkumiga oid juftlik berilgan?
Toʻgʻri javob: A) sevgi − kuzgi
Ushbu test topshirig‘ini bajarish uchun abituriyentlardan so‘z turkumlariga oid bilim va ko‘nikmaga ega bo‘lish talab etiladi. Mazkur topshiriqda berilgan «sevgi − kuzgi» juftligidagi birinchi so‘z (sevgi) faoliyat-jarayon ma’nosini bildirib, nima? so‘rog‘iga javob bo‘ladi va ot turkumiga mansub so‘z sanaladi. Ikkinchi so‘z (kuzgi) esa paytga xos belgini bildirib, qanday? so‘rog‘iga javob bo‘ladi va sifat turkumiga oid so‘z sanaladi. «muattar − iforli» dagi har ikkala so‘z qanday? so‘rog‘iga javob bo‘ladi va sifat turkumiga oid so‘zlar hisoblanadi. «chiroy − ko‘rk» va «chiziq − qiliq» dagi har ikkala so‘z ot turkumiga mansub so‘zlar sanaladi.
Manba: UZBMB namunaviy test topshiriqlari (2020, majburiy). N.M.Mahmudov va boshqalar. Ona tili. 6-sinf uchun darslik. "Tasvir" nashriyot uyi. Toshkent−2017