Hol qatnashgan gapni toping.

Ushbu test topshirig‘ini bajarishda abituriyentlardan gap bo‘laklari haqidagi bilim va ko‘nikmaga ega bo‘lish talab etiladi. «Noshud ketganda maqtanar, Botir − qaytganda.» gapida payt ma’nosini bildirib kelgan ketganda va qaytganda so‘zlari qachon? so‘rog‘iga javob bo‘lib, fe’l so‘z turkumi bilan ifodalangan kesim (maqtanar)ga bog‘lanib kelishi kuzatiladi, ya’ni payt holi vazifasini bajargan. «Men yoz faslini yaxshi ko‘raman.» gapidagi payt bildiruvchi so‘z (yoz) qaysi? so‘rog‘iga javob bo‘lib, ot so‘z turkumi bilan ifodalangan (faslini) to‘ldiruvchiga bog‘lanib kelgan va gapda sifatlovchi aniqlovchi vazifasini bajargan. «Aytar so‘zni ayt, Aytmas so‘zdan qayt.» gapi aniqlovchi, to‘ldiruvchi va kesim bo‘laklaridan tashkil topgan (aytar, aytmas so‘zlari sifatlovchi aniqlovchi, so‘zni, so‘zdan so‘zlari to‘ldiruvchi, ayt, qayt so‘zlari esa kesim). «Urushning boshi − o‘yin, Oxiri − o‘lim.» gapidagi urushning so‘zi qaratqich aniqlovchi, boshi va oxiri so‘zlari ega, o‘yin va o‘lim so‘zlari kesim vazifasida kelgan. Demak, qolgan gaplarda holning qatnashishi kuzatilmaydi.

Manba: UZBMB namunaviy test topshiriqlari (2020, majburiy). M.Qodirov va boshqalar. Ona tili. 8-sinf uchun darslik. "Tasvir" nashriyot uyi. Toshkent−2019